Путешествия Гулливера / Гулливердің саяхаттары - Джонатан Свифт

Бостандық алуымнан екі-үш күн бұрын ойдан шығарған әртүрлі ойын-сауықтар көрсетіп патша мен сарай адамдарының көңілін көтеріп жүр едім, деревня адамдары Таудай Адамның алғашқы табылған жерінен орасан үлкен, ортасында биіктігі кісі бойы томпағы бар, етек-етегі енді жөне өте жалпақ, көлемі патшаның жатақ бөлмесіндей бір ғажайып қара зат көрдік деп патшаға шапқыншылар арқылы хабар жеткізді. Ол затты көрген адамдар біз білмейтін біртүрлі жануар болар деп алғашқыда үрейлері ұшып, тек оны бірнеше рет айналып қарап, қимылдамай жатқан жансыз зат екенін білген соң ғана тынышталыпты. Олар бірінің иығына бірі асылып, жұмбақ заттың үстіне шығыпты, заттың үсті тегіс екен. Аяқтарымен басып қарап, ішінің қуыс екенін анықтапты. Хабаршылар сөздерін қорыта келіп, ол зат Таудай Адамдікі болса керек деген пікірлерін айтыпты. Егер де ұлы мәртебелі тақсыр керек қылса, ол затты астанаға жеткізу үшін болғаны бес аттың күші керек депті. Мен әңгіменің төркініне түсініп, қатты қуандым. Шамасы, корабль апатынан кейін құрғақ жерге шығып не істерімді білмей қайғырып, ренжіп жүргенімде, басымнан қалпағымды жел ұшырып кеткенін сезбей қалсам керек. Қайықта отырғанымда қалпақтың бауын иегімнің астынан тартып байлап едім, қайық аударылғаннан кейін толқынмен алысып жүріп құлағыма түсіре киген болатынмын. Сол жерде бауы шешіліп түсіп қалған қалпақты теңізде жоғалды деп ойлаппын. Ол заттың не екенін патшаға түсіндіре келіп, алдырып беруін өтіндім. Келесі күні қалпақ астанаға жеткізілді. Қалпаққа барған адамдар көп ойланып тұрмапты. Қалпақтың қырпуын екі жерден тесіпті де, жіп өткізіп алып ат жегіп сүйретіпті. Ол жақтың жері жазық және тегіс болғандықтан қалпақ онша бүлінбепті.